Apeli i GJKKO, ka shtyrë seancën gjyqësore ndaj kryebashkikut të zgjedhur të Himarës, Fredi Beleri.
Mësohet se seanca e radhës do të mbahet me datë 25 qershor, ora 13.00.
Kujtojmë se Beleri ndodhet në qeli prej 12 Majit 2023 për blerje votash dhe është dënuar nga Gjykata e Posaçme me dy vite burg.
Por Fredi Beleri ka ankimuar vendimin në Apelin e GJKKO-së dhe ka pretenduar pafajësi.
Sot para togave të zeza, Beleri u shpreh se provat ndaj tij janë manipuluar, ndërsa shtoi se “jam arrestuar në emër të kryeministrit Edi Rama”.
“Unë ndërgjegjen e kam të qetë”, ka thënë ai ndër të tjera.
Beleri: Jam arrestuar në emër të kryeministrit dhe provat janë manipuluar. Unë ndërgjegjen e kam të qetë dhe ju kur të shpallni vendimin ta keni të qetë ndërgjegjen tuaj.
Në seancën e së premtes morën pjesë familjarë dhe mbështetës të Belerit, përfshirë edhe ambasadoren greke në Tiranë, Konstantina Kamitsi.
Beleri dhe avokatët e tij mbrojtës i kanë cilësuar akuzat si politike dhe të pabazuara.
Beleri fitoi ulëse në Parlamentin Evropian si përfaqësues i partisë udhëheqëse në Greqi, Demokracia e Re, në zgjedhjet e qershorit.
Zgjedhja e Belerit si deputet i Parlamentit Evropian shkaktoi polemika – si për legjitimitetin e tij, ashtu edhe për ndikimin e rastit të tij në integrimin evropian të Shqipërisë.
Juristë dhe ekspertë të marrëdhënieve ndërkombëtare thonë se rasti i tij ngre shqetësime kushtetuese dhe ligjore.
Sipas tyre, ai mund të ndikojë edhe në përpjekjet e Shqipërisë për anëtarësim në Bashkimin Evropian, por edhe në marrëdhëniet e saj me Greqinë.
